最近英國終於冇咁熱，但診所反而多咗病人問我：「醫師，點解天氣冇咁熱，我反而仲攰？」「飲極水都仲係好口乾。」「最近仲試過流鼻血，到底發生咩事？」其實，呢啲都係熱浪過後好常見嘅情況。
從中醫角度看，熱浪後的不適主要源於暑熱天氣大量消耗了身體的「氣」（推動功能的能量）與「津液」（滋潤身體的液體）。這種損耗導致身體機能下降，出現疲倦、口乾、甚至鼻腔乾燥出血等現象，需要時間及適當調理才能恢復。
點解熱浪過後反而特別攰？
中醫有句說話：「暑易傷氣，暑多傷津。」意思係炎熱天氣會令身體不停流汗去散熱，而汗液流失嘅唔單止係水分，仲會消耗身體嘅「氣」同「津液」。中醫認為「氣」係推動人體各項功能嘅能量。暑熱最容易耗氣，當氣不足時，就會覺得冇精神、四肢乏力、做少少嘢都攰，再加上胃口差，脾胃運化功能下降，身體未能充分吸收營養，自然更加難恢復元氣。
所以熱浪過後，好多人都會覺得：
- 成日攰、冇力
- 精神唔集中
- 做少少嘢都覺得攰
- 瞓極都唔夠精神
如果熱浪期間又瞓得唔好，身體恢復自然會慢啲。
點解飲極水都仲係口乾？
暑熱引起大量出汗而令身體消耗好多津液，肺胃失去足夠滋潤，所以口乾、喉嚨乾，飲完水都仲係覺得唔夠滋潤。津液唔單止係我哋飲落肚嘅水，而係負責滋潤口腔、喉嚨、鼻腔、皮膚等組織。所以有時即使飲咗好多水，都仍然覺得口乾、喉嚨乾、鼻腔乾乾哋，同皮膚容易乾燥。
補充水分當然重要，但身體恢復津液都需要時間，所以唔係一朝一夕就可以完全改善。
點解會流鼻血？
最近都有幾位病人因為流鼻血嚟求診。中醫理論認為「肺開竅於鼻」，肺亦負責宣發津液去滋潤鼻腔。當津液不足，鼻腔黏膜會變得乾燥，細小血絡失去滋養，就容易因打噴嚏，甚至輕輕捽鼻而出血。若暑熱仍未完全清解，加上陰液不足，虛熱內擾，亦會令鼻絡更容易受損，所以有些人在熱浪過後會反覆流鼻血。
從現代醫學角度睇，高溫加上水分流失，亦會令鼻黏膜乾裂，所以熱浪過後偶爾流少量鼻血並唔罕見。
病案分享
曾有一位病人於感暑後前來求診，主訴包括：
- 容易疲倦乏力，感覺「成個人冇晒力」
- 頭重重，精神難以集中
- 口乾口渴
- 近幾日頻密流鼻血
- 夜晚瞓得唔好，容易醒
- 胃口明顯變差
- 大便不暢，排便唔順
從中醫角度分析，患者屬於暑熱耗傷氣陰，加上津液不足，令身體未能及時恢復正常功能，因此出現疲倦、口乾、睡眠欠佳及鼻腔乾燥流鼻血等一連串症狀。
治療方面，以益氣養陰、生津潤燥、清暑和中為原則，處方選用了太子參、桑葉、香薷、百合、石斛、麥冬、蓮子、淮山、茯神、天花粉等中藥，按病人的體質及症狀作加減。
經過約五天治療後，病人再次覆診時表示疲倦感明顯減輕，精神比之前好，頭重感、口乾情況及流鼻血問題都已改善，睡眠質素及胃口亦有恢復。
由於急性症狀已大致改善，第二階段治療便著重進一步調理體質，以改善氣陰兩虛的情況，幫助身體逐步恢復陰陽平衡，提升自身修復能力，減少日後再次因天氣變化而出現類似不適。 每位病人的體質及病情都不同，中醫強調辨證論治，同樣的症狀未必適合同一條藥方，因此切勿自行依照他人的處方服藥。如有持續不適，建議由註冊中醫師面診，按體質制定合適的治療方案。
熱浪過後，飲咩湯水好？
比起一味飲涼茶，我更建議選擇益氣、生津、潤燥嘅湯水，幫身體慢慢恢復。
太子參麥冬無花果瘦肉湯
材料：
- 太子參 15g
- 麥冬 10-15g
- 無花果 3-4粒
- 粟米 1條
- 瘦肉約 300g
做法：全部材料洗淨，加約2公升水，大火煲滾後轉細火煲約1個半鐘，最後按個人口味加少量鹽調味即可。
適合：熱浪後容易疲倦、口乾口渴、喉嚨乾、睡眠一般、身體仍然覺得有啲燥的人士。
功效：太子參補氣而唔燥，麥冬養陰生津，無花果有潤肺健脾作用，適合作為暑熱過後嘅日常食療。
全仁清心飲
材料：
- 百合 10g
- 蘆根 10g
- 白蓮子 10g
- 雪梨乾 15g
- 灯心草 2紥
做法：把材料放入煲，加1.5公升水，水滾後以文火煲30分鐘取湯。可加糖調味。
適合：因曬太陽，過渡流汗，甚至中暑的小朋友或成人；BBQ或飲食熱氣後也可飲用。
功效：清心除煩，生津解渴。
日常調理小貼士
- 💧 唔好等口渴先飲水，少量多次補充水分。
- 🥗 飲食以清淡為主，少食煎炸、辛辣同燒烤。
- 😴 保持充足睡眠，俾身體有足夠時間恢復。
- 🚶♀️ 天氣冇咁熱之後，可以慢慢恢復適量運動，例如散步或伸展，唔需要急於做高強度運動。
點解天氣涼返啲，我反而仲覺得好攰？
這是因為熱浪期間身體為了散熱而大量出汗，消耗了大量「氣」（能量）和「津液」（體液）。這種損耗不會立即恢復，所以即使天氣轉涼，身體仍處於虧虛狀態，導致持續疲倦。
淨係飲水可以解決口乾問題嗎？
不完全可以。雖然補充水分很重要，但中醫認為的「津液」是需要脾胃運化吸收後才能生成，用以滋潤全身。暑熱會削弱脾胃功能，因此單靠飲水未必能有效轉化為津液，需要配合益氣養陰的食療來幫助身體更好地吸收和利用水分。
熱浪過後流鼻血需要擔心嗎？
偶爾少量流鼻血通常不需過度擔心，這多數是因津液不足導致鼻黏膜乾燥脆弱所致。但如果流鼻血頻繁、量多或難以止血，就應尋求專業醫療建議，以排除其他可能性。
飲涼茶會唔會好啲？
不一定。涼茶多數性質寒涼，適合暑熱未清、實熱證的人。但對於熱浪後氣陰兩虛、身體虛弱的人來說，過飲寒涼的涼茶可能會進一步損傷脾胃陽氣，反而令身體更難恢復。選擇益氣生津的溫和湯水會更適合。
免責聲明：本資訊僅供一般參考之用，不能替代專業的醫療建議、診斷或治療。文中提及的所有健康相關術語或狀況均基於傳統中醫（TCM）理論與實踐，使用者應從中醫的角度理解這些術語，其含義與現代醫學中的定義可能存在顯著差異。例如，「脾虛」或「肝氣鬱結」等概念是中醫特有的術語，與現代醫學中的解剖或生理學定義並無直接對應。中醫方法旨在輔助現代醫療，而非單獨解決健康問題的方案。若您有健康相關的疑慮，請諮詢合資格的醫療專業人士，以確定最適合您的治療方式。中醫調理會因個人體質和情況而有所不同，並應由具備專業資格的執業中醫師執行。 我們的產品只供診所病人經診症後購買。診所會審核訂單並保留取消訂單的權利。