有一位女士，兩年間先後失去雙親。經轉介後嚟接受輔導。

第一次見面，佢話：「我唔知有咩可以講。我照常返工、照常生活，因為工作忙，好多客戶要我照顧。但有時會失眠，成個人好攰。我知道自己有啲問題，但又講唔出係咩，希望你可以幫我搵到答案。」

佢每日如常上班、處理工作、照顧客戶，生活彷彿一切如常。

聽落去，好似應付得好好。

但佢自己都察覺到內心有啲嘢，只係難以言喻。

事實上，佢將情緒隔離，彷彿將難以處理的感受密封在一個罐入面，加蓋收好，讓自己繼續生活、保持運作而不被情緒打亂。

對於一啲習慣堅強、難以接納自己脆弱一面的人嚟講，呢種應對方式好常見。

我邀請佢，嘗試慢慢與內心那份哀傷連結。並預先提醒佢，過程中可能會出現陌生甚至不太舒服的感覺，鼓勵佢嘗試去感受。

佢「見到」一個很悲傷、很孤單的自己，但同呢個自己保持一段距離。

我問佢：「當你見到佢，你會想點做？」

佢話：「我覺得佢需要一個擁抱，但我唔想攬佢。」

呢個反應，反映出佢平日對情緒的態度──抗拒、想抽離。

佢習慣將情緒收埋，令自己可以維持所謂「正常」的生活節奏。因此，當面對自己脆弱、悲傷的一面，自然會產生抗拒，因為咁樣代表「唔堅強」、「唔理性」。

但呢次，佢能夠「看見」那個受傷又孤單的自己，係一個提醒。

佢都察覺到，原本繃緊的身體慢慢鬆開，坐姿變得輕鬆，無再用雙手保護自己。

之後，佢要開始處理父母留下的住所。

佢話：「我想像唔到點樣行入去，講再見好難，好似一講完就乜都無晒，我冇咗個可以返去嘅地方，諗到就瞓唔著。」

我哋一齊探索：如果唔係「講再見」，佢會想講啲咩呢？

她靜咗一陣，然後慢慢講：「多謝呢間屋俾咗我咁多美好回憶，讓我開心咁成長；希望未來住喺度嘅人，都一樣喺安全同有愛之中生活。」

講完呢番說話後，佢明顯鬆了一口氣。

佢將那份告別的哀傷與失落，轉化為感恩與祝福。

至於嗰個「好悲傷、好孤單」嘅自己，佢話佢仍然「見到佢」，但要真正靠近，仲需要啲時間。

佢決定，有需要的時候，會打電話俾個好朋友，問候一下對方。我望住佢笑，佢都忍唔住笑，話：「暫時只做到咁，未咁快可以開口講自己唔開心。」

我點頭，笑住回應：「咁已經係一個好大嘅轉變啦。」

免責聲明：本資訊僅供一般參考之用，不能替代專業的醫療建議、診斷或治療。文中提及的所有健康相關術語或狀況均基於傳統中醫（TCM）理論與實踐，使用者應從中醫的角度理解這些術語，其含義與現代醫學中的定義可能存在顯著差異。例如，「脾虛」或「肝氣鬱結」等概念是中醫特有的術語，與現代醫學中的解剖或生理學定義並無直接對應。中醫方法旨在輔助現代醫療，而非單獨解決健康問題的方案。若您有健康相關的疑慮，請諮詢合資格的醫療專業人士，以確定最適合您的治療方式。中醫調理會因個人體質和情況而有所不同，並應由具備專業資格的執業中醫師執行。 我們的產品只供診所病人經診症後購買。診所會審核訂單並保留取消訂單的權利。